Hiche Singsit website in adei le tup thupi ho chu Singsit Insung mitehi iki thethang lheh jeng tauvin, leiset gam ijat ham khat na iki thedal taovin ahi. Mun chom chom le gam chom chom ma icheng chehdeh jeng tauvin munkhat le gamkhat na ichen khom nau jong aum thei tapon, leiset gam ijat ham khat iki thedal lhajeng tauvin chule gam tampi le mun tampi ilosoh tauve.
Chuto lhon chun, phat le nikho anache anachen phat che dungjui jin ium umnao gam pao itho thei taovin chuleh ichen chen nao gamho chonna ho jong ihin la thei uvin, ihin bolthei tauvin ahi. Chutolhon chun khang tamtah ihung kikhen phat uvin insung khat, sopi khat, sungkhat peng hijeng jong leuhen pao le ham khatna kihetto nale kihoumat tona jeng jong ana umthei tapon ahi. Chondan khandan jong kibang thei talou vin, agam gam chondan le khandan cheh ihin chepi tao vin ahi, hitichun phat ahung che jing tolhon in tulam lam hin chu Singsit te chondan khandan (custom & culture) jong koipen ti umlouvin ina haimil jou gam tauvin ahi.
Hiche thisan khat sungkhat peng ho se hin apu apa kondohna (origin) le ahung kipatdoh nau mun le ahung khanlet nau le khanlet dan hou ahin kihet kit theina diu chule pu le pa chondan ho ahin kikep bit jing theina diu gelkhoh najala hiche tobang website hohi hung poimo a chuleh khangson khangson hon jong apu apa chonchan le khanchan ho le nunchan ahin kihet jing theina diu hi deisah umpen tah khat chu ahung hitan ahi.
Hiche website a thu le la um ho jouse a kona leiset kolning li acheng cheh Singsit insung miten kolning langkhatna kona kolning langkhat a um Singsit chapa-chanu khat nin jong achon ding dan le akhan ding dan ahin kihet thei nading chule hiche ho chu mangthah louva ahin kichin tup jing diu hiche website in atup thupi pen chu ahi.
