Singsit Organisation (SO) thusim lahchom
1937 kum in Pu Siehjachung, Bombalpa lamkai na in Bombal a Singsit chate ana kikhom uvin Singsit Organisation phudoh lou akhoh dan thu ana seikhom uvin ahi. Hiti chun kum 2 sung mobilise ana bol jou uvin 14 April, 1939 ni chun Kul-Bollen kho a SO chu ana phutdoh tauvin ahi. SO kiphudoh suhdet na din Kul-Bollen a date 22nd December, 1940 nikho hin kilolna ana nei uvin ana sudet tauve. Hiche a ana pang chu lamkai mi 18 ana hiuve.
1. Pu Thongkhosei Doulut, Chairman
2. Pu. Tongkam Hanmang, Secretary
Singsit Organisation ana kiphudoh vang in lamkai a ana pang ho ana mollem gam phat uvin athalheng diu jong kilheng chuom talouvin 1953 kum chan chun ana thip del tauvin ahi. Ahinla 1954 kum in Pu (L) Tongkhopao lamkai na in Tolbung kho a kikhopna ana siem kit uvin SO chu ana suhing kit tauvin ahi. Kithang-at thei tah khat chu SO hi India in chamlhat (independence) amu masang (kum 8 masanga), British te vaihomna nuoia aum lai a ana kiphutdoh ahitai. Akiphudoh apat tukum 2016 chan hi kum 77 alhinna ahitai. Platinum (75 years) jong ihung galkai u ahitai. 2014 kum chu SO Platinum Jubilee (1939-2014) ana hi tai, ina man tahlou vang uva, chuleh SYO a dinga tu kum 2016 hi Diamond Jubilee (60 years) kum ahi (1956-2016).
Pi le pu te, mi masa ho hi ichan geija mitvah na nei ana hiuvem? Khang hunglhung dinga Singsit chate kitoh tah a kengkhat a idinkhom thei na diu lampi eina boldoh peh uva, abul eina pat pieh uhi kipa um ta leh kithangat um tah chu ahi. SO ana kiphudoh lai ahin Thadou sunga phung bahkai ho koima hitobanga kiloikhom na nei ana umdiu tahsan aumpoi.
Singsit te hi ichan geija ana masa hiuvem ihetthei na diuvin anuoi a Eimi organisation ho kiphudoh kum ho gah vekah ute.
1. Singsit Organisation - 14 April 1939
2. Kuki Youth Association - 1940
3. Hmar Congress - 1954
4. Paite National Council - 1956
5. Gangte Tribe Union -1958
5. Hmar National Union -1959
6. Baite National Union -1962
7. Kuki Students' Organisation -17 October 1963 (1st President Pu P.K. Singson)
Hi chan geija ana masa te tua ipi iti u hitam? Mi ngoh louvin, eima chieh ki khuolchil thah kit u hitin, sopi ngailut na ana lhasuo ium khah tah ujong leh lunggel thah keng in, ngailut na a kikankhom in pheiphung suon khom kit taute.
Pathien in Singsit chate phatthei ei buoh jing tau hen.
