PU THANGKHOLUN SINGSON (1957-2016)
Hinkho Thusim Chomcha
Amuollemsa Pu Thangkholun hi 1957 kum in Chingmei vangkho, Henglep sub-division ah anapiengin ahi. Amahi (L) Pu Paojalen leh Pi Lhingjakim laigilga lah a atahpen ahi. Apu khanga pat mihatte anahiu ahin, thagum patna ah aguol sang ah achungnungjo cheh un ahi. Ahung golhan til in Nagaland a school anakaijin, ahat jeh chun Nagaland a cheng eimi ho sungah ahung minche lheh in ahi. Sports lang?a songse (shortput) leh chopsau(longjump) lamah koima ama phajou anaumpon ahi. Khatvei hi mihon ahatdan apatep nom jeh un guitar a semdinga kigong vongthing (akisui loulai) asuhsah gouvin ahileh ama jong akisonglel thimin kijum teiding ahitai tin akigel pumin asuh leh kidangtah in vongthing chu kehni akiso jengin ahi. Hiche masang jong chun thingphung kengngong teho jong ajung puma abodohsah jiuvin akiseije.
Pu Thangkholun hi koima hillouvin, ama changseh in martial arts kungfu, boxing tiho anakijil jin, Bruce Lee bolho anaboljin ahi. Kungfu stick vai jong anathem in, kungfu stick avaipet a songa ise jong leh atahsa sepkhalouvin availha ji e anatiuve. Nagaland a aum sungin NAP (Nagaland Armed Police) ah training bollouvin lha 3 tobang anapangin, apansung chun NAP sung pumpi a boxing instructorpa (Kerala mi) toh kisuto dingin anaum in ahi. Aumdan chu instructorpa chu ajo a ahileh NAP sunga chu ahsi 3 akibeh jeng ding dan anahi. Boxing rule ahetloujeh chun athemho koma akihilsah got leh boxing themho chu amahil dinga akisonlel jeh u chun anahil nom/ngam jilou dan uh ahi. Akisuhpi dingpa toh ama weight akikheh beh jeh chun ajan in mot phengkhat toh ahcha pumkhat toh ahtui tamtah ananehsah un ahi. Ajinga instructorpa toh akisuhsah uleh thagum in ajouvin, ahinla boxing rule ahetlou jeh chun analel tan ahi. Nagaland sunga mihat in akithangin, eimi hon jong anakisonpi lheh un ahi. Nagaland a pat in ahungkile in, Manipur a lekhasim ban ajomin, 1982 kumin BOSEM noija class X ana pass in, abanin Churachandpur college ah PU leh BA anasim in ahi. Manipur a jong eimi sunga mihat in akithangin ahi. Conference kibolna ho a ?muscle show? anaboljin ahi.
Mi guong lhing tah ahitoh lhonin, 10th Feb, 1980 kumin SYO (Singsit Youth Organisation) conference ah " Mr Singsit " title anamun ahi. 31st Oct 1981 kumin " Mr KSO" title anamun, akumsung maman " Mr Kuki " title anamu kit in ahi.
Pu Thangkholun hi calligraphy themtah ahitoh lhonin, Songdo tamtah anajih doh man in ahi; adeh a Henglep sub-division sung ah akhutsoh milestones mujing thei din aumin ahi. Chuleh handicraft lama jong lungthim thuhtah neimi leh akhutnamlhah hoi mi ahi.
Pu Thangkholun hin sopi pasal 6 leh numei 3 aneijin? (L)Pagin, (L)Haova, (L)Pavung, Nengkim, Neonu, Chonkholal, Hathoi, chuleh Thenkholam ahiuve. Anaote pasalho jong ahattheijun, atahsao alhing theijun ahi. Pu Pagin hi ?Lunglenna Chollha? kiti Thadou-kuki film actor anahi. Haova jong sepoy sunga boxing champion anamu jin ahi. Pavung hi khutthem anahin 1993 kum a boilaijin gal manchah hoitah tah anasem in galmi ho a kona kivennan anakimange.
Pu Thangkholun hi 1992 kumin (L)Lhingnei Haokip toh anakicheng lhonin, vangset jeh in cha leh nao anahing lhon tapon ahi.
May 9, 2016 (Monday) nin angailut a insungmi dalhan Pa koma kicholdo din anache masa tan ahi.
